中環出更：特首辦為環保 拒收鄉局刊物
今屆政府主張節約同環保，但呢個主張未必人人受落，皆因新界鄉議局本月收到一封來自特首辦嘅信件，下款由行政長官私人秘書發出嘅，話日前收到鄉議局惠贈特首嘅《鄉情》刊物，謹此致謝。不過，基於政府奉行環保原則，所以叫鄉議局日後毋須再寄贈有關刊物畀特首嘞，最後再加一句「有拂美意，尚請見諒」，搞到鄉議局一眾執委感到不滿，唔接受特首辦拒收嘅理由。
數月至半年出版一次
《鄉情》係鄉議局每逢三至六個月出版一次嘅刊物，內容除概括局方處理過嘅問題外，仲有訪問執委嘅報道。雖然鄉議局網站亦有《鄉情》嘅電子版本，但上載時間就遲過印刷本刊出時間最少兩至三星期。鄉議局尋日開會傾到特首辦拒收《鄉情》一事，即刻議論紛紛，有執委仲發悔氣話，佢哋一向都有寄刊物畀社團、地區團體及政府機構，但既然特首辦咁環保，以後連電子版都唔製作喎。
卓妮