中環出更：超鳳掌女童軍望父開心
香港女童軍總會前晚喺灣仔會展中心舉行周年大會暨晚宴，賭王何鴻燊千金何超鳳（Daisy）接任新一屆總監，而將於明年四月下旬卸任嘅現任總監彭徐美雲，就升呢做副會長。Daisy笑笑口話，因為工作太忙，至今仍未同父親匯報，但相信父親從報章報道得悉佢當上總監後，必定好開心。問佢賭王近況如何，佢話爸爸精神好好，仲周不時攻打四方城添！
當晚城中名媛靚太女童軍齊現身，包括四洲集團主席戴德豐夫人戴胡美蓉，玩具大王蔡志明夫人蔡李惠莉及遠東發展榮譽主席邱達昌夫人邱吳惠平等副會長，仲有著名心臟科醫生謝德富太太陳曦齡及同珍後人王賜豪醫生，特首夫人梁唐青儀亦以會長身份出席。離開咗女童軍兩年幾嘅前教育局局長孫明揚夫人鍾小芬都有到場，佢話會一如既往咁支持女童軍喎。
喺今次選舉中，以唯一候選人及全票當選總監嘅Daisy表示好開心，佢話自己由八歲小朋友加入女童軍至今，投入感有增冇減。來年上任後，首先要主力搞好第三十五屆女童軍協會世界會議，Daisy希望藉此提升香港的世界地位。展望未來三年任務，仲有籌備新總部搬遷，緊接其後係香港女童軍總會成立一百周年慶典，每樣嘢都好需要會內手足鼎力支持。
彭太難忘帶小朋友訪京
快將完成三年總監任期嘅彭徐美雲笑笑口話，雖然卸任在即，但完全冇唔捨得嘅感覺，事關佢仍留喺女童軍。諗返任內最難忘嘅事，莫過於親自帶小朋友訪問北京，令下一代更加認識中國，未來會照樣大力支持Daisy咁話。
卓妮