正所謂十萬火急，消除火警危機理論上梗係刻不容緩啦，偏偏急驚風遇上慢郎中，消防處竟然慢條斯理。根據審計署報告，截至今年七月十五日，消防處未完成處理嘅投訴積壓一千五百多宗，大約一成個案拖咗接近一年，最嚴重嘅拖咗四百二十五日仍然未採取行動。
喂，萬一投訴真係有根有據冇花冇假，消防處懶懶閒容乜易死得人多o架？審計報告仲揭發喎，消防處最離譜嘅表現係吹水唔抹嘴。該處喺本年度管制人員報告之中，竟然聲稱過去兩年處理消防安全投訴百分百達標，一嘢被審計署踢爆並非事實。簡單咁講，消防處弄虛作假，未達標訛稱達標。
之不過咁，常規工作就話愛理不理啫，政府部門對待為民喉舌嘅東方報業集團一向非常積極兼且不遺餘力，絕對唔會拖得就拖。消防處今年六月聲稱收到電郵投訴，二話不說馬上高調派人去到位於大埔工業邨嘅東方報業中心，要求直闖屬於傳媒核心嘅伺服器房，經檢查後證實投訴子虛烏有。因乜事幹會有兩種截然不同嘅處事態度嘅呢？無他嘅，打壓正義傳媒係官老爺嘅秘密任務吖嘛。
「東方報業民意調查」結果顯示，對於消防處延誤處理消防安全投訴，不達標竟然又冇匯報，三成八受訪者直斥做法不負責任；三成一認為匯報制度被動，無法有效監察；兩成四批評消防處弄虛作假，隱瞞失誤。
關於消防處積壓過千宗投訴未處理，四成六受訪者覺得處方得過且過；兩成五憂慮埋下火警嘅計時炸彈；兩成三不滿消防處工作態度怠慢。
好嘞好嘞，一方面態度怠慢，另方面非常積極兼且不遺餘力咁踩上報館，借頭借路進行所謂檢查，受訪者又點睇呢？三成八質疑消防處玩針對，涉嫌選擇性執法；三成六嚴斥處方懶理公眾安全；兩成一認為係不務正業。
正如城市大學專業進修學院學術統籌宋立功話齋，消防處聲稱處理投訴全部達標與事實不符，輕則行政失當，重則可被視作造假，如有需要警方應介入調查。
應查嘅唔查，唔應查嘅就起勢咁查，一來固然係打壓傳媒嘅不君子行為，二來咯喎，隨時害到小市民性命不保。大家不妨假設一下，消防處出盡九牛二虎之力玩針對，利用毫無根據嘅投訴滋擾東方，反而忽略真正嘅安全隱患，到頭來有日久失修嘅建築物火燒後欄點算吖？
消除火警不力，打壓東方積極，好心消防處唔好再不務正業嘞，全香港不知有幾多人等住消防員去救，秘密任務呢家嘢唔做好過做啦！