「貪湯」前廉政專員湯顯明在任廉署五年間，先後率團外訪卅五次，狂燒公帑四百萬元，更被前下屬穆斐文爆料，指部分行程「玩嘅成分居多」。現任專員白韞六當然引以為鑑，繼前日事先張揚率團前往巴拿馬共和國出席國際反貪局聯合會會議，並順道訪問美國，廉署尋日喺網頁巨細無遺列出所有行程，確保冇任何旅遊景點。
白Sir美洲之行尋日出發，一共去十一日，係佢自去年七月上任以來第七次外訪，以往最遠去到印度、馬來西亞，最多去四日，其中一次去深圳，更加即日來回，平均每次帶四人，相信唔會有玩嘅成分。
白Sir今次行程真係好緊密，除咗準備喺聯合會會議中作專題演說，亦會同「透明國際」高層會面，去巴拿馬之前仲順道訪問美國，會晤紐約市調查局、聯合國屬下「全球契約計劃」、聯邦調查局（FBI）、司法部、國務院、政府道德辦公室、世界銀行同「世界正義工程」代表，行程非常緊密，今個月廿七日先返香港。