政情：澳門又派九千 黃士心荷包脹
澳門又派錢九千元，康泰旅行社董事長黃士心都受惠。因為投資澳門開旅行社三十幾年，黃老闆早已獲永久居民身份資格，但派錢金額累計有幾多，佢就好少理，全權交由秘書負責喎。
濠江政府連續七年派錢，每名永久居民合共拎到四萬八千元，和味到極。荷包多咗錢，會否帶旺旅遊業？尋日現身沙田馬場嘅黃士心就話唔多覺。佢分析話，澳門人口唔算多，筆「肥水」多極有限，亦未必流到去旅行社身上，不過有錢派，都係好事，黃老闆就係得益者之一嘞。佢自爆雖然並非澳門出世，但多年前投資濠江，金額唔嘢小，當地政府早已畀個永久居民身份佢，可惜一直太忙唔得閒辦理手續，直至○八年起澳門政府派錢，佢至拿拿聲去拎番張澳門身份證，仲連同張香港身份證一齊袋埋喺銀包入面添。
濠江封大利是點樣使？黃老闆就話無時間理，亦一次都未提過錢出嚟使，總知有錢袋就happy。