政情：曾鈺成「搞破壞」 寸爆傑出學生
立法會主席曾鈺成愛辯論，尋日佢同班新界區傑出學生真情對話，學生一講唔到重點，曾鈺成就不留情面寸爆佢哋。呢種「另類教學」刺激學生思考，對學生嚟講好過上堂啦。
本來呢場關於政改嘅真情對話，由學生開始發問，但反斗嘅曾鈺成一坐低就玩嘢，話平時負責維持秩序，今日決定先破壞秩序，反問在場學生邊位覺得有普選後，二○三○年情況好過現時，點知在場近百學生只得幾人舉手，咁曾鈺成就問係咪差過現時？又係得幾人舉手。之後曾鈺成就忍唔住爆咗句「呢度唔係個個都係傑出學生咩？乜傑出學生唔講嘢嘅咩？」
曾鈺成後來又問班學生到底咩叫「作主」，有學生就話市民作主除咗要知道權利外，仲要知自己有咩義務。曾鈺成又唔滿意，佢皺晒眉頭話：「乜你講嘢咁似我哋啲司長嘅？」暗諷學生講嘢遊花園唔到題。
不過喜歡鬥嘴嘅曾鈺成都唔係無弱點，當記者追問佢點睇黨友鍾樹根公然喺議事廳大叫香港電視主席王維基「收皮」時，好辯嘅曾鈺成都唔識答，惟有笑笑口走人。