政情：「遠」離熱廚房 寧做講古佬
政治問責制自○八年擴大以來，已經先後有多個政治助理「跳船」，當中有人辭官歸故里，亦有人漏夜趕科場。好似前食物及衞生局政治助理陳智遠（Paul）自去年離開官場，除咗進身金融界搵真銀，熱愛旅行嘅佢仲笠多兩頂帽，做導遊兼出書做作家，生活多姿多采。難得成功逃出熱廚房，Paul表明無意重返官場，寧願繼續「不務正業」，反觀接替莫宜端出任勞工及福利局政助嘅黎穎瑜（Jade），未趕得切熱身已經匆匆上戰場。
Paul新書講座狂倒自己米
離開月薪十三萬元嘅高薪厚職，孑然一身嘅Paul繼續揹起背囊行萬里路，更將游走七十八個國家嘅精華故事濃縮喺佢本新書《遠行：細聽文化旅途》。不過，Paul尋日出席新書講座時就率先幫自己倒米，講明新書冇任何必玩、必食推介，想睇旅遊攻略嘅唔該放低本書喇，仲笑言擔心新書喺香港市場會成為銷量「毒藥」。
回顧四年政助生涯，讀政治學出身嘅Paul坦言過去晚晚通宵工作，而且圍繞骨灰龕、街市同豬流感，雖然同政治學大纜都扯唔埋，但都叫做有得發揮，無愧於心。對於新政府接連有手足跳船，Paul笑言都係佢哋嘅個人決定，「因為廚房幾時都係咁熱」。而Paul離開政府後仲創辦本地文化深度遊「活現香港」，將外國流行捐窿捐罅嘅行街團引入香港，實行自己帶團做講古佬。重返政府？No Way！
Jade少同工會打交道耍冧
另一邊廂，Jade就屬於「漏夜趕科場」嗰批，經常同勞福局拉鋸嘅工聯會立法會議員黃國健同陳婉嫻，尋日同Jade同場出席活動時，就齊聲話同Jade未夠熟落。Jade即時耍冧，承諾會盡快約佢哋食飯見面，又承認過去工作流於政策層面，的確少同工會打交道，上任後一定會努力同工會多多溝通咁話。睇怕Jade上任後莫講話去旅行，連照顧小朋友都好難度期。