中環出更：林鄭母子同場拒絕合照

大仔Jeremy唔會從政

Jeremy尋日代表「無止橋」介紹工作，原來佢過去雖然喺英國讀書，但四年來都有做義工，專返內地幫窮鄉僻壤搭橋修路。尋日兩母子相隔幾十米都係各做各嘅事，好有默契唔提對方，又拒絕合照。每當記者問到撐唔撐媽咪做特首、又問媽咪平時同佢傾咩議題，佢都好有禮貌咁皺起眉頭話：「今日呢個場合，唔討論呢個議題喇。」讀數學、啱啱大學畢業嘅Jeremy又講明自己唔會從政，未來可能投身非牟利機構。

雖然唔肯講媽咪，但Jeremy依然樂意同記者分享難忘經歷，佢話有次去甘肅幫人起橋，見到班小朋友細細個就照顧自己，因為父母出晒去其他省份打工養家，佢話見到呢個情景好感觸。不過林鄭忙得嚟咁顧家，有幾年都特別要求調去倫敦工作，就係因為要陪家人，相信Jeremy唔會覺得被媽媽冷落嘅。

卓妮