中環出更：顧明均自爆中學讀足十年

中學時代嘅顧明均讀書成績相當麻麻，其他人讀六年就中學畢業，但佢竟然喺培正讀足十年，當中包括三次留班同一次「撻班」，即係由中二跌番落中一再讀過。後來中學無畢業，顧明均就去台灣留學。雖然讀書一啲都唔叻兼成日留班，但顧明均仍然深得老師喜愛，原來係因為佢經常代表學校參加校外田徑百一米欄比賽，為學校贏得唔少獎牌。

昔日就讀培正嘅舊生唔少已經成為政經界重要人物，行政會議成員周松崗、工總名譽會長孫啟烈、足總主席梁孔德及戲劇大師鍾景輝都有即場緬懷往日時光，佢哋除咗背得出培正校歌之餘，仲互相分享讀書時期嘅趣事，大讚培正學生活潑好動，絕唔會係書獃子。

黎藉冠（右一）太太羅詠詩（右二）原來同培正校董李文俊（左一）太太黃敏儀（左二），都係真光女校出品。（葉華英攝）

何國鉦、陳祉妤（後右、左）與演繹Baby Doll系列嘅小模特兒攝於後台。

何國鉦時裝騷「賀壽」

城中一班紅藍舊生亦出錢出力，幫培正小學教育發展籌款。校友發揮所長多才多藝，著名時裝設計師何國鉦（Dorian）同名模陳祉妤（Balia）都出自培正，一衆培正幼稚園生着上由Dorian設計嘅Baby Doll系列，上演別開生面嘅時裝表演。同學會會長黎藉冠為晚宴出咗唔少力，全憑太太羅詠詩幫手，不過太太唔係培正舊生，而係真光嘅出品。

卓妮