「小朋友玩意」 球手未聽過
【本報訊】石澳障礙高球場乃全港碩果僅存唯一一個障礙高球場，早年九龍仔公園與維園亦曾設有此類障礙高球場，但俱已改建多年，至於年輕一代對此類活動場地亦無甚認識。職業高爾夫球手游凱零直言「連聽都未聽過」有障礙高爾夫球場，「我諗呢啲場應該係純粹娛樂，但如果免費開放畀市民都咁低使用率、甚至冇人知，我諗政府真係宣傳得好唔夠！」游認為有關球場對小朋友較吸引，建議政府如要保留必須加強推廣。
「呢啲場地七十年代已經有，當時設立都係純粹畀市民玩吓當休閒活動，並唔係用嚟做訓練。」香港浸會大學體育學系副教授雷雄德指出，當年屬未有太多康體設施的年代，故此類球場亦為不少港人留下美好的回憶。「當年我去石澳旅行都有去玩吓o架，以前維園都有一個呢啲場，不過喺後來都拆咗！」
被正規場淘汰
不過，雷雄德補充，隨着愈來愈多人接觸高球運動，參與者多選擇到正規高爾夫球場，加上正規場地亦附設有推桿練習場，令障礙高爾夫球場漸漸被人遺忘。雷雄德建議當局，必須因應時代及社會的轉變而適時改善康體設施，亦可以考慮因應附近社區需要而改建場地。