長者屋大家見得多，私樓加長者屋又見過未？房協搞搞新意思，旗下嘅筲箕灣新樓盤「樂融軒」除咗提供二百幾個私樓出售單位，仲提供六十個出租長者單位，美其名長幼共融喎，如果私樓買家同時租用長者單位供父母或其他年長親戚居住，可獲優先揀樓咁話。之不過，話就話長幼共融，其實價錢一啲都唔「老幼咸宜」o架，如果你以為房協會因為你嘅孝心而提供優惠，咁就錯晒喇。
呢，尋日房協公布首批單位售價，最貴單位超過一千萬元，呎價一萬五千有多，最平單位呎價都要接近一萬三千元；至於出租長者單位，月租最貴要一萬八千三百元，最平嘅細單位月租都要一萬一千三百元。換句話講，如果有人想發揮孝心實行「長幼共融」，同時買最平嘅單位及租最平嘅長者屋，每月供樓加埋租金都要三萬幾元，試問有幾多基層市民負擔得起呢？老實講，咁嘅價錢市面大把選擇喇，使乜一定要幫襯房協吖。
房協又點講呢？佢哋話喎，呢個樓盤係市區重建項目，同一般資助房屋唔同，只能以市價推出，如果為買家提供資助，可能會助長炒風。嗱，問題就喺呢度嘞，作為法定機構，房協主要職責應該係協助基層市民解決居住問題，例如興建多啲公屋或居屋，而唔係本末倒置，興建呢啲價錢媲美私樓嘅單位囉。近年市建局一味向錢看，起埋晒啲「豪宅」，搞到基層市民望樓興嘆，早就被人批評同私人發展商冇乜分別，估唔到依家連房協都係咁，問你服未。
咁都未算吖，房協仲被指賺到盡添。呢嗱，「樂融軒」牆身特厚，窗台特大，食水仲深過私人發展商咁滯。人哋就話在商言商啫，房協唯利是圖又點解釋吖？所謂長幼共融咯喎，根本係大隻講！
所以話，房協嘅角色不倫不類，話就話係非官方機構，實際上係三不像，一時獲政府提供地價優惠興建資助房屋，一時又變身發展商興建私樓與民爭利，都唔知究竟想點。除咗房協之外，仲有房委會及市建局都同房屋有關，疊床架屋，各自為政，互不協調，簡直浪費資源。功夫茶諗極都唔明，點解港府一定要設立咁多衙門呢？點解唔可以簡化呢？
係人都知，家陣房屋問題嚴重，公屋輪候申請宗數已超過二十二萬，幾多基層市民望天打卦，房協與其興建私樓牟利，不如諗辦法增建公屋或居屋仲好喇。好簡單，房協旗下有咁多舊屋邨，只要加快重建步伐，唔只可以幫到無殼蝸牛，仲可以幫港府分擔唔少難題添。民生無小事吖，幫基層市民解決居住問題，港府同房協都有責任o架！