政情：公民講場：「開放」急轉彎莫乃光大細超

香港嘅3G頻譜面臨重新洗牌，財力雄厚嘅中國移動香港更被指勢成大贏家，有望全取重拍嘅3G頻譜。泛民主派立場堅定嘅資訊科技界立法會議員莫乃光（Charles），早前為爭取增發免費電視牌照一直走在最前線，但對於今次進一步開放電訊市場竟然一反常態，力撐佢所屬界別嘅四大電訊商選民，擔心現有服務水平下降，成本轉嫁畀用戶云云，總之一味靠嚇唔撐重拍頻譜。對於佢立場急轉彎，Charles強調電訊服務同電視發牌係兩回事，自己一直唔支持拍賣頻譜，何來持雙重標準喎！不過，佢承認選民意見一定要聽，但仍堅稱唔係針對中移動呢股「紅色力量」，Charles對「開放」嘅定義認真耐人尋味。