政情：鄭泳舜跑上癮 赴日首戰全馬
年前愛上跑馬拉松嘅深水埗區議員鄭泳舜（Vincent），「跑癮」一發不可收拾，除參加香港多個馬拉松比賽外，今日將越洋前往日本神戶，首次挑戰「全馬」。Vincent對今次比賽好認真，備戰咗四個月，每日返工前或放工後都會自動埋位跑步，每周練跑八十公里，幾個月來風雨不改鍛煉，激瘦十多磅，太太胡可兒都詐型話佢操到太瘦。
積極鍛煉做「飯桶」
Vincent今次越洋挑戰，全因朋友推動，三人行齊齊報名，全程達四十二公里，預計有數萬人參加，場面唔嘢小，佢有信心喺四小時內跑畢全程。為做「飛人」，Vincent唔介意變身「飯桶」，三餐多吃澱粉質，由每餐一碗飯加至兩碗飯，又狂食菜及減少食肉，精神反而好咗，感冒都少咗。跑得咁投入，到底有乜心得？Vincent自嘲係悶人，練跑時唔使聽歌解悶，反而一邊跑一邊諗工作，諗好方案後，跑完步後馬上實行，工作效率快好多喎。