政情：訪英自費議員唔吼
立法會議員不時應各地政府、組織邀請，接受贊助飛赴當地考察，加上議員每屆任期有五萬五千元外訪津貼，唔少外訪團都出現爭崩頭情況。不過，將於下星期喺倫敦舉行嘅英國英聯邦議會協會（CPA）國際議會會議，竟然拍晒烏蠅無議員報名，連抽籤都慳番。據聞，除咗同早前爆出行政、立法兩會議員攜妻帶女豪遊法國接收新飛機嘅醜聞有關之外，講到尾原來都係錢作怪。
過往有「贊助」爭崩頭
CPA九月透過立法會秘書處，邀請兩名議員飛赴倫敦國會，出席今個月廿五日舉行嘅國際議會會議。雖然類似邀請條件多多，包括要求建制派及泛民主派陣營各派代表參加外，代表中亦要男女同額兼鼓勵年輕議員參與，而且最好熟悉會議議題，兼長遠打算留喺議會發展，但去年立法會行政管理委員會就包辦兩名議員嘅所有使費，結果吸引七人競逐，最終由梁繼昌同葛珮帆跑出，代表立法會參加會議。
不過，今年班議員就要自費參加會議，除咗自費二百英磅（約二千五百港元）會議費用外，連來回香港倫敦機票、食宿都要自掏荷包，更謝絕任何朋友家屬陪同，議員昔日「基於社交禮儀」而攜妻帶女免費豪遊就此情不再喇，唔怪得議員諗過度過都選擇縮沙，連去年落空嘅五人都冇再報名。立法會秘書長陳維安揸住成手報名表格一份都派唔到出去，真係唔知點同英國嗰邊交代喇。
法豪遊風波後紛避嫌
議員過往外訪唔貴唔去，諗盡辦法縮數都為求最終由外訪津貼埋單，唔少議員仲乘機帶同另一半外訪當度假，但自法國豪遊風波一役後，班議員都紛紛避嫌，冇咩事都唔敢外訪，雖則冇再招人話柄，但今次國際會議對提升議政能力有得益都無人問津，實在可惜。究竟議員向來外訪係為咗開公數去旅行吖？抑或真心想吸取外國議會經驗回饋立法會呢？真係得佢哋自己先至知喇。