政情：中環出更：用手「踏」單車 高永文死撐輕鬆
傷殘人士行動不便嘅辛苦，相信普通人唔係咁易感受得到，尋日傷殘青年協會搞咗個「健障行」傷健共融活動，特別安排一眾嘉賓試騎「手踏單車」，食物及衞生局局長高永文都有份參加。要用對手來踩單車，就梗係辛苦啲啦，卓妮見高永文起步時係威係勢，表現得非常興奮，仲話好輕鬆添，點知騎五百米後已經喘晒氣，似乎有啲雞手鴨腳。
體驗傷殘人士困難
話說高永文剛坐上手踏單車時，好似得到新玩具咁童心大發，仲話只係騎五公里唔夠喉，即刻被義工糾正佢，其實佢只需要騎五百米咋。去到五百米中途站，高局長已經大汗淋漓，但就死撐話好輕鬆，仲話記者笑佢喘晒氣，令佢覺得好委屈喎！呢頭講完，嗰頭就即刻叫助手拎水畀佢飲，睇嚟佢都應該知道傷殘人士行動不便係幾咁辛苦喇。
尋日活動共有五百名健全同殘疾參加者，齊齊由沙田白石角行去大埔海濱公園，大會特別安排健全人士戴上「膝部固定器」行五百米，畀佢哋體驗肢體殘障嘅困難，有市民話戴咗「膝部固定器」後，隻腳屈曲唔到非常辛苦。
卓妮