搬屋少不免會搵人裝修，經常搬屋嘅人非常明白兩個道理，第一係裝修師傅永遠唔會準時完工，第二係即使你心急入伙都唔可以死催爛催，因為一催就容易出事，裝修師傅話唔定會將水喉駁錯屎渠。
好嘞，大家應該記得添馬艦新政府總部啟用初期係幾咁丟人現眼o架啦，唔係惡菌肆虐，就係天花漏水，究竟係乜嘢原因造成嘅呢？講來講去咪又係貪曾遺禍囉，前特首曾蔭權爵士好大喜功吖嘛，一心希望造價五十四億元嘅政府總部能夠喺自己任期完結之前入伙，等自己主持啟用儀式攞威，所以夾硬催逼工程人員披星戴月趕頭趕命，終於趕出一個甩甩漏漏嘅巨型爛攤子。嗱，唔係功夫茶冤枉佢，係有審計報告詳盡數據佐證o架。
最新一份審計報告指出，前年十一月政總大樓移交程序大致完成嘅時候，仲有接近九萬項缺漏未完成，更加離譜嘅係，去到今年四月即係大樓竣工兩年之後，大部分工程保養期屆滿嘞，被揭發嘅缺漏增加至十六萬三千多項，直至今年八月仍然未完全修妥。
未修妥嘅缺漏例子包括，大樓喺大雨過後會有漏水及滲水問題，政府總部辦公大樓打算畀食堂營辦商使用嘅太陽能熱水系統損壞，閉路電視系統影像不穩定，攝像機嘅時間紀錄不一致等等。審計署建議，建築署日後實施工程項目，必須採取措施確保承辦商喺保養期內或其後嘅合理時間完成修補缺漏工程。
設計上標榜「門常開」嘅政府總部之所以淪為豆腐渣工程，罪魁禍首正正係死催爛催嘅貪曾，名副其實害人害物。受害嘅其中一個人叫做孫明揚，呢一個當時嘅教育局局長本身已經患有腎衰竭，政府總部開張不久，身子弱嘅孫明揚就證實染上退伍軍人症。食水供應設施使用率低係退伍軍人病菌繁殖嘅原因之一，審計署發現，政府總部三十五個附設淋浴設施嘅高官私人洗手間有四成並非經常使用。
門常開，醜常來，貪曾雖然已經執包袱落台，之但係貽笑大方嘅醜事依然長揭長有，你話係咪香港嘅悲哀吖？所以功夫茶真係衷心促請廉政公署盡快為調查貪曾作出一個了斷，既然有證有據就馬上提出檢控，唔好再左拖右拖曠日持久。你知啦，貪腐兩個字已經係厭惡性字眼，家陣連內地都全力反貪，香港又點可以容忍貪曾呢啲敗類！
人一走，茶就涼，貪曾留低嘅唔止一杯涼茶，仲係一杯變壞變味嘅苦茶，唔該搵人倒鬼咗佢，以免污染社會呀！