「西門豹治鄴」的故事大家耳熟能詳。這位魏文侯時的好官，通過調查，了解到那裏的官紳和巫婆勾結在一起危害百姓，把大巫嫗、巫嫗弟子、三老先後投入河中，粉碎了「河伯娶婦」的殘忍習俗。然後「發民鑿十二渠，引河水灌民田，田皆溉」。
老朽提起這則二千多年的史事，並非「人之患」的陋習發作，而係有感於審計報告踢爆消防處處理投訴及執法有多項失職，尤其「假稱」過去兩年處理消防投訴百分百達標。事實係消防處積壓未完成處理嘅投訴多達一千五百宗，最嚴重拖延四百多日。
咁搞法，諗落真係死得人多。講真，部門如果真係人手唔夠，大可以招聘；之不過，又唔係咁噃，消防處今年六月二十一日，單憑一封由網吧發出嘅虛報電郵，卻大鑼大鼓煞有介事的進入《東方》伺服器房調查，最後證實大廈消防系統運作正常，當被問及是否已聯絡有關投訴人，消防處支吾以對。
呢呢呢，消防處之前又話對任何投訴都一視同仁，保安局局長黎棟國受陳偉業議員質詢又廢噏，答了等於冇答；如今審計署報告終於道出消防處嘅混帳！真正消防安全無人理，上門惡搞《東方》最積極！
阿哥，《東方》作為全港銷量冠軍，只為市民發聲，公義第一，消防處竟視其為殺父仇人，否則點會憑一個虛報電郵就如鯊魚嗅到血腥，立刻撲上去？有學者歸納出人類六種基本表情：憤怒、恐懼、快樂、傷心、厭惡、驚訝；後來學界又由厭惡引伸出了第七種：輕蔑——消防處管理層惡搞《東方》，把關不力，理應鄭重道歉！否則，不懂反思，令人輕蔑，只會一錯再錯，「西門豹治鄴」的故事恐怕要重演！一眾禍首不投維港難以令烏煙瘴氣嘅消防處起死回生！