審計署日前發表審計報告批評政府對私人體育會所土地用途監管不力，免地價或象徵式地價出租土地畀私人會所，任由營運食肆、酒吧及體育用品店等牟利設施。其實有關私人會所無王管嘅問題已非新鮮事，只係民政事務局局長曾德成多年來一直闊佬懶理，要人踢一踢，先至郁一郁，被審計署批評後先至出嚟補鑊。好似之前香港大球場爛地事件就係好例子，如果唔係成為國際大笑話，兼被輿論抨擊，德成局長都唔會出來認錯及宣布重鋪草地。所以難怪有人話，副局長許曉暉同常秘楊立門似局長多過曾德成囉！
