政情：九倉繪畫賽 推動藝術發展
第三屆「九龍倉全港中學生繪畫比賽」尋日舉行啟動禮，擔任比賽評審嘅著名藝術家莫一新、薩凡納藝術設計學院（SCAD）香港分校副總監柏君予大談創作心得，上屆得獎學生亦齊分享參賽體驗，現場仲有廿位中學生即時創作繪畫立體字，氣氛熱鬧。
創造唔少雕塑嘅莫一新話，喺香港搞雕塑創作嘅難題，係空間狹窄令到作品嘅尺寸受限制，事關藝術工作室多數喺工業大廈，所以要考慮貨車及貨（車立）嘅大細，有時作品仲要斬件方便搬運，唔似外國咁自由。講到規管二次創作問題，佢認為有關規管對創意工業有負面影響。
得獎者可申獎學金升學
九龍倉集團執行董事李玉芳話，比賽歡迎全日制中學生參與，希望鼓勵佢哋發揮創意，培養對藝術文化嘅興趣，從而推動本地藝術文化發展。得獎者除可獲得書券及現金外，亦有機會參與短期藝術課程及海外藝術交流活動，首十八名同特別表揚大獎得主更可以向九倉申請獎學金，用於修讀與藝術有關嘅學士課程。