政情：公文袋播帶 離題萬丈
特首梁振英（ＣＹ）同財爺曾俊華（鬍鬚曾）近期陸續會見立法會各黨派及社會人士，就施政報告及財政預算案諮詢意見。不過，經常批評官員答問題似部「人肉錄音機」嘅泛民主派議員，近日向特首表達意見時經常離晒題不特止，同樣係「播帶」表達意見。尋日輪到公民黨（公文袋）見特首，會面過程又係提及免費電視發牌問題，就連政府講明年底會展開諮詢嘅政改都要表達意見，好似撐船咁唔知撐去咗邊。
品評梁笑容 認真嘥時間
公文袋六名立法會議員尋日早上見ＣＹ同鬍鬚曾一小時，黨魁梁家傑喺會面後話，佢哋喺會上特別關注三個議題，分別係西環干預特區內部事務，又提及免費電視發牌一事，仲要求ＣＹ搞好政改，如果唔係就樣樣都搞唔掂，但佢不滿ＣＹ對於呢三樣嘢都冇正面回應。梗係啦，ＣＹ同鬍鬚曾一早講明會面係聽取各界意見，一般都唔會就見面人士嘅意見作出回應，當收集所有意見後，用以制訂施政報告同預算案。
正因為ＣＹ無回應，公文袋議員就轉移品評ＣＹ嘅笑容，又「批盪式」又「石膏式」笑容，認真難服侍。其實公文袋都準備咗成五十二頁嘅建議書，由政制改革、增加土地房屋供應、扶貧、教育等，就連保障動物權益都有，但係講得最多就係免費電視發牌，唔知同施政報告及預算案有乜關係呢？難怪ＣＹ要睇錶啦，可惜公文袋議員仲未自覺提出嘅意見離晒題，仲話ＣＹ睇錶唔恰當，換轉喺立法會開會，一早就被主席打斷發言喇！
老屈毓民 梁家傑好帶挈
講開公文袋，梁家傑早前喺區內張貼投票反對引用《立法會（權力及特權）條例》調查免費電視發牌嘅議員名單海報，但佢竟然誤將喺原議案投贊成票嘅黃毓民當成反對議案嘅一分子，激到毓民要出信投訴。雖然梁家傑之後有去信毓民道歉兼承諾撕走海報，但政治嘅嘢好多時都會令市民觀感先入為主，就算事後補鑊已經作用不大，公文袋認真好帶挈。