中環出更：稱非「張三李四」 魔僧不談佔中
綽號「魔僧」嘅中央政策組前首席顧問顧汝德（Leo Goodstadt），繼早前出席新書發布會後，尋日再搞新書宣傳午餐會，除咗講香港貧窮問題外，其他政事一概不談。佢仲喺午餐會後同記者講，話自己並非「張三李四」，所以唔評論「佔領中環」行動（佔中），以及免費電視發牌等問題喎。
讚香港「全世界最好」
雖然顧汝德唔評論佔中，但佢突然問起記者有關香港去年因遊行集會而被捕嘅人數，仲好清楚咁講出有五十六人被捕呢個答案。之後佢話呢個數字只佔非常少數，證明香港係一個好成熟（Mature）、規矩（Decent）嘅城市，同時亦係非常適合居住嘅地方。
至於現時社會出現嘅紛爭，顧汝德就話，香港無論發生乜事，港人都會第一時間將問題放上枱面，如上屆特首所講，港人要求一個完美嘅政府，咁好似對政府唔公平，但市民認為好多事都係應份嘅，正正係呢啲原因，令香港成為一個好地方，仲話「全世界香港係最好嘅」咁話。
講到貧窮問題，顧汝德喺午餐會上話，設立貧窮線會好危險，會分散社會處理真正問題嘅集中力。至於派錢，佢就形容為「disgusting（惡心）」，指呢個做法唔係集中幫助基層喎。
卓妮