中環出更：勤滴眼藥水 小吉護目有法
支持內地白內障患者重見光明嘅「健康快車」，日前舉行一年一度籌款晚宴，喺灣仔君悅酒店筵開近三十席。創會主席方黃吉雯（小吉）響應大會「白色的高貴」主題，穿上雪白蕾絲晚裝，並黐上一排亮麗眼睫毛，雙眼亮晶晶。原來小吉護眼有秘方，每日勤滴滋潤眼藥水，等雙眸無咁易攰喎。
小吉十幾年前做咗激光矯視手術，分外注重護眼，出街例必戴太陽鏡。講完護眼，小吉不忙晒吓湊大「健康快車」的成績表。佢話火車醫院已增至四列，又有五十一個診症中心遍佈全中國，今年已吸引來自世界各地共五十位眼科專家親往交流，期望醫療團隊繼續壯大，造福更多病人。
「快車」籌款 范太捐名筆
當晚籌款盛況，政商界名人紛紛買枱支持，健康快車主席范徐麗泰帶頭捐出一部銀色智能手機，以及一支限量版墨水筆，呢支筆係紀念已故摩納哥王妃嘉麗絲姬莉（Grace Kelly），好矜貴。范太話，佢喺少女時代曾係Grace Kelly影迷，早前收到友人送贈呢支筆，本來唔捨得割愛，但諗深一層，捐出來幫助別人意義更大。
人稱「媽打」嘅前民政事務局常秘李麗娟第一時間出價七千三百元競投支筆，可惜最後被一位印度善長投得。媽打慨嘆現代人好少執筆寫字，佢就鍾情寫心意卡送贈好友，習慣多年不變，所以收藏唔少靚筆寫咭，分外真情流露。
卓妮