消防處理論上係好忙o架，忙到甩轆嗰隻，否則都唔會積壓大量投訴個案未處理啦。之但係又好怪雞喎，既然消防處忙到一個頭兩個大，點解又咁得閒處理一單針對東方報業集團嘅無厘頭投訴呢？如果唔係別有用心製造白色恐怖打壓傳媒，真係冇辦法解釋呢一種匪夷所思嘅離奇現象。
首先睇下消防處究竟點怪雞吖。審計報告踢爆消防處喺處理投訴及執法方面最少十宗罪，其中最離譜係弄虛作假，消防處聲稱過去兩年處理消防安全投訴百分百達標，其實根本係講大話，部分投訴個案嚴重延誤。呢，審計報告指該處積壓一千五百幾宗投訴未完成處理，最嚴重嘅個案拖延四百二十五日，問你服未！
喂喂喂，千幾宗投訴未完成處理，唔理你係手腳太慢定係存心偷懶，意思即係話消防處有好多工作等住要做啦。喺咁嘅情況之下，消防處以所謂接到電郵投訴為名，今年六月高調派員踩上東方報業中心最敏感嘅心臟地帶，調查伺服器房嘅消防系統，結果證明投訴不成立，你話係咪古靈精怪吖？莫講話東方認為係政府機器圖謀不軌，借頭借路箝制新聞自由，連立法會議員都睇唔過眼要仗義執言。
陳偉業議員早前提出書面質詢，要求保安局清晰交代，包括消防處會否有充足表面證據先至展開調查，當局有否措施確保各政府部門不因私怨或傳媒機構作出負面報道而濫用權力，冇充分理據之下透過調查滋擾傳媒機構。之不過官老爺最擅長嘅永遠係耍官腔，保安局局長黎棟國答完等於冇答。
消防處有千幾宗投訴延誤處理，漠視消防安全，偏偏對東方情有獨鍾，唔理三七二十一即刻特別關注，呢家嘢已經有問題啦，簡直係不務正業，其實仲有一件事好荒謬，若然無論投訴是否具名、是否事實都會調查，係咪變相鼓勵市民報假案呀？不如咁啦，功夫茶家陣就投訴，消防處處長陳楚鑫屋企有消防安全問題，麻煩派員上門徹底調查，索性開水喉灌救防患於未然更佳！
除咗積壓投訴個案，消防處仲被審計報告揭發懶理一年警鐘誤鳴超過一百次嘅樓宇，間接喺全港埋下無數計時炸彈，簡直靠害。
該查就唔查，唔該查就亂咁查，消防處本身其實應該接受調查就真。嗱，消防官僚弄虛作假，究竟有冇涉及刑責，處長係咪失職，會唔會接受紀律處分，當局必須向公眾交代，唔好再學黎棟國咁，答完等於冇答呀！