政情：公民講場：貪曾坐貴椅 政總執漏係咁意

金鐘添馬艦新政府總部自啟用以來爆出連串醜聞，最觸目驚心係港府高官多個私人廁所被驗出有退伍軍人症桿菌，審計報告尋日進一步揭發，原來新政府總部直至前年十一月移交程序大致完成時，竟然仍有好多缺漏同餘下工程尚未完成。講到底，「貪曾」前特首曾蔭權爵士係一系列甩漏嘅罪魁禍首，因為佢當年為一己私欲想喺執包袱前入伙新政府總部，催逼承建商日夜趕工，落成啟用後又無督促做好執漏工作。如果要數新政府總部最穩陣嘅嘢，相信係貪曾治下嘅特首辦，事關佢竟然豪花超過二萬七千元買咗嘅兩張名牌貴價座椅，認真奢侈。