政情：大學搶地潮 陳新滋打古蹟主意
大學搶地風停不了！浸會大學爭取李惠利地皮尚未成事，但已計劃再謀古蹟。浸大校長陳新滋尋日出席學生公開論壇時話，預計明年一月城規會先至討論李惠利地皮土地用途，但佢呢頭仲爭緊地起中醫院，嗰頭又有鴻圖大計，透露學校正積極物色古蹟，希望繼「雷生春」後再活化其他項目，但未有透露地點同發展項目類型，只係話最緊要配合到古蹟嘅特色喎。
除咗李惠利爭地風波進展外，亦有學生追問陳新滋，早前資訊日民主牆懷疑被校方刻意遮蔽一事，質疑校方「河蟹」，發問學生仲引述立法會議員鍾樹根近日嘅金句，叫學校「收皮」。點知陳校長聽到火都嚟，話任何人講「收皮」呢句說話都係不負責任，搞到學生最後憤然離場，樹根今鋪真係教壞人。
沈祖堯盼青少助社會
另外，中文大學校長沈祖堯尋日亦為其新書《灌溉心靈的半杯水》舉行簡介會，對於日前中大有學生接獲特首梁振英（CY）頒發青年服務大獎時，促請CY要順從民意，沈祖堯就話年輕人好直，表達意見係無可厚非，佢又引述學生話唔希望年輕人同政府對抗，係一件好事，盼年輕人從積極角度諗吓點樣可以幫助香港社會。