政情：中出升呢五大商會
正所謂一朝天子一朝臣，香港商會勢力最近重新洗牌，以往最傳統嘅四大商會分別係香港總商會、中華總商會、中華廠商聯合會及工業總會，但近日已重新正名為「五大商會」，第五大就係中華出入口商會（中出）。話說幾日前商界聯席午餐會，搞手正正就係五大商會。有心水清嘅商界中人話，呢個格局重未出現過，今次中出地位提升，並非同該會每年攞到爆膏鮮甜嘅大閘蟹咁簡單。
梁重慶考察 派代表隨團
其實以往政商界都有「五大商會」呢個統稱，但第五大商會向來都係「地產建設商會」，但隨住政府多次推出穩定樓市辣招，令地產發展商同政府關係變得疏離，最近九月CY帶領商界到重慶考察，四大商會代表都齊晒人，中出代表亦有份隨團，唯獨係地產建設商會就無人跟團。當時已有商界人士察覺到，認為中出有望成為第五大商會，但當時亦有商界人士覺得只係巧合，所以冇太大反應。
不過，隨住今個星期一，中出與其餘四大商會聯合舉辦午餐會，成功請到CY出席，當時CY仲多謝五大商會邀請。有商界中人透露，之前四大商會通常同其他商會如澳洲商會、美國商會等合辦午餐會，但今年嘅組合屬首次。
大閘蟹宴 林鄭捧場唔食
講到中出，佢哋喺政商界有個出晒名傳統，每逢入秋都會宴請政商界及傳媒好友到中出會所食大閘蟹，聽聞今年唔少高官都有捧場，連政務司司長林鄭月娥都係座上客，但據講林鄭怕寒涼唔敢食大閘蟹，只能品嘗其他美食，但足以引證中出地位今時唔同往日，莫非同該會活躍參與政治有關係？
中出會長莊成鑫話，今年大閘蟹質素好好，雖然中出慣例係一餐飯每人食三隻，但佢自己都要忍口，每餐一隻起兩隻止，但由十月尾至今已經食咗四、五十隻。嘩，咁食法唔怕太寒涼咩？佢話只要每餐都飲話梅太雕再加薑茶驅寒，咁就唔使驚喎。咁唔知蟹膏嘅膽固醇又點化解呢？