中環出更：楊釗講佛偈：唔好怕蝕底
篤信佛教三十三年嘅中華總商會會長楊釗，平日愛以佛偈會知音人，但公開講道，算係少有。楊釗尋日應中總婦委會及青委會邀請，以「佛學與人生」為題分享成功錦囊，大談致富之路，佢無投資貼士，亦無股票冧巴，秘訣好簡單，就係「讓對方先贏，創造雙贏」，一句講晒，即係唔好怕蝕底！
名人擔櫈仔 員工當客仔
楊釗講道，城中名人擔櫈仔，連港大佛學研究中心管理委員會主席李焯芬、理工大學前校長潘宗光、中總副會長盧文端、婦委會副主席周娟娟及西方寺方丈寬運法師等齊捧場。楊釗話，縱橫商界四十年，煩惱何止八萬四千個問題，佢總結一招對付煩惱，就係一個「忍」字，遇到忍無可忍嘅事，佢會咬緊牙關再忍一次。再三忍耐下，困境自然跨過。
楊釗管人、待客，亦有一套，佢直言要當員工、投資者係顧客，做事要符合對方利益。在利益關頭前，甚至讓對方先贏，咁做唔代表投降，而係肯蝕底，反而贏得對方信任，齊齊創造雙贏。所以佢告誡年輕人及富二代要戒懶散，忌目標太多、唔專心。佢又話，成功無捷徑，要勇於承擔、肯吃虧吃苦，仲要肯學習。呢番話嗒落句句有禪味，台下嘉賓都似乎有所領悟。
卓妮見到福建幫頭領盧文端條頸貼咗塊大膠布，原來佢近排太忙，前晚攰到喺梳化瞓着，搞到拗住條頸瞓都唔知，一覺醒來，頸部痛到唔郁得，惟有貼住塊止痛膠布頂住先。同場仲有稀客潘宗光，佢退休五年，一直自修佛學，閒來幫助內地清貧學生上學，人生逍遙自在。
卓妮