一代才女張愛玲講過人生在世有三大恨事，一恨鰣魚多刺，二恨海棠無香，三恨紅樓夢未完。如果張愛玲係一位活躍於香港嘅游泳健將，佢大概會加多一恨：四恨泳池水淺！
古語有云，龍游淺水遭蝦戲，說明水太淺係唔適合大展身手o架，否則好容易出現淺水浸蛟龍嘅滑稽現象。之但係好可惜，特區政府嘅辦事作風一向都係半桶水，搞到連興建泳池都唔湯唔水。大家知唔知一個符合國際標準嘅泳池應該係幾長幾闊幾深呢？答案係長五十米，闊二十五米，深兩米。按照呢個國際標準，香港嘅所謂康體設施簡直係大笑話！
呢嗱嗱嗱，又要算一算舊帳嘞。前特首曾蔭權○九年趾高氣揚舉辦東亞運動會，當時嘅民政事務局局長曾德成拍晒心口，話香港嘅康體設施會以達到國際水平為目標。時光飛逝，四年過去，大家估下家陣嘅泳池搞成點吖嗱？觀塘游泳池今年四月重建啟用，長係夠五十米嘅，闊都有二十五米，不過最深水部分只有一點九米，兩邊水深更加只有一點四米。換言之，觀塘游泳池由於水太淺而未能達到國際水平，冇資格舉辦國際性賽事。
至於前年新建位於西營盤嘅中山紀念公園游泳池，情況亦係差不多，池水不足兩米深，白白耗資五億八千萬元，竟然由於不符合國際標準而絕緣於國際盛事。如果加埋觀塘游泳池嘅重建費十三億元，特區政府可以話係浪費咗超過十八億元興建兩個業餘到極嘅戲水池！
所以話啫，泳池水淺確係游泳健將嘅一大恨事。即使係業餘人士走去幫襯觀塘游泳池，你都咪以為好過癮，因為場館嘅機械通風系統設計失誤，大熱天時氣溫隨時高過三十度，身處其中少不免有一種焗桑拿嘅難堪感覺。換言之，即使觀塘游泳池夾硬舉辦不獲國際認可嘅小學雞比賽，對於泳手以及觀眾而言，都係相當考驗忍受能力嘅折磨。
講咗咁耐，大家係咪覺得「貪曾遺禍」四個字熟口熟面呢？冇錯嘞，一個曾蔭權，一個曾德成，兩個同姓三分親嘅曾氏同鄉會會員夾手夾腳搞到香港嘅康體設施丟人現眼。嚴格而言，應該係「孖曾遺恨」至啱。
話時話，本地游泳健將真係好鬼死慘情o架，莫講話缺乏符合國際標準嘅泳池吖，就算平時練習都係一大難題。學似前香港泳隊隊員蔡曉慧話齋，個個泳會都要爭地方練水，若然去到公眾泳池練水，身邊唔係阿伯就係阿婆，泳手幾叻都會受到影響啦。
好大喜功嘅官老爺曾經有意申辦二○二三年亞運會，好彩失敗咗咋，否則可恨嘅泳池水淺肯定貽笑大方！