政情：張華峰撐盧吉道建酒店
城規會早前通過山頂盧吉道27號大宅改建成精品酒店，引起好多行山人士反對。不過，金融服務界立法會議員張華峰就力撐起酒店，原來佢為咗減肥同呼吸新鮮空氣，每逢周日都會帶同小狗上山頂行個圈。佢話有幾次經過盧吉道時已經喘晒大氣，如果嗰度改建成酒店，又附設咖啡室，一眾行山友經過就可以坐低休息吓，兼夾欣賞山頂景色。
行山想歎杯咖啡
張華峰話做咗議員後成日坐，惟有周日做運動補數，所以每周日都會同小狗Charles上山頂散步，有時隻狗仲唔夠佢行得快，力證自己運動量唔係講笑。不過，佢話山頂無乜輔助設施，如果將來盧吉道大宅改建成酒店，只要酒店附設咖啡室佢就支持喎。睇嚟佢都係想搵個歇腳地方啫，淨係開間咖啡店咪合符佢要求囉！
除咗行山，張華峰仲要睇實個股市，佢預計明年一旦取消港幣同人民幣每日兌換上限，最大贏家實係港交所，咁現時係咪入市時機？佢就叫大家唔好短炒，但如果想投資可以留意下零售股同出入口股，因為美國經濟慢慢復甦，加上大環境無乜負面因素，長線投資可以一試喎。