中環出更：稀客鄧蓮如避談政事
香港青年協會尋日搞咗個「香港青年服務大獎」頒獎禮，請到唔少政界猛人出席，連好耐無現身嘅前行政及立法兩局首席非官守議員鄧蓮如（Lydia）勳爵同丈夫唐明治都罕有出席。不過，Lydia避談現時嘅政治局勢，但拒絕記者一刻依然保持優雅笑容，顯得落落大方。
馬時亨笑說「三個字」
對於行政會議召集人林煥光日前要求政府檢討免費電視發牌過程，行會成員陳智思當聽到「林煥光」三個字，就話：「林煥光我唔講」，隨即轉身走人。至於商務及經濟發展局前局長馬時亨就搞笑話：「三個字！不予置評！」似乎佢對南區區議員馮煒光「三個字」金句嘅印象都好深刻喎！
講番個頒獎典禮，經過嚴格甄選後分別有五位青年獲獎，其中一位得獎者鄧敏琳上台時，就乘機向頒獎嘅特首梁振英（CY）表達意見，佢話自己成立公司推廣「惜食」文化，期間見到好多不公義現象，希望CY可以聆聽青年意見後先至制訂政策。
卓妮