中環出更：等候上訴 麥齊光愁遊中環
因為詐騙政府租金津貼搞到冇得撈嘅發展局前局長麥齊光單官司正等候上訴，咁啱卓妮日前喺中環畢打街見到佢一支公閒逛，佢途經幾個商場，莫講話停低買嘢，就連望下都冇，可以話係漫無目的、百無聊賴。麥齊光逛咗唔夠一個鐘就搭穿梭巴士返屋企，佢上到車仲不時望窗托腮沉思，唔知係咪煩緊上訴嘅事。
行商場只「幫襯」洗手間
當日天氣唔係幾好，落住微微細雨，麥齊光唔知係咪冇帶遮，特登行咗落港鐵站，再經地下通道行去置地廣場。不過，佢喺置地並冇行商店買嘢，淨係「幫襯」咗個洗手間，然後行去太子大廈。佢喺太子大廈又行咗一陣，之後就經皇后大道中行到雪廠街，等穿梭巴士返去位於中半山花園台嘅屋企。
麥齊光一支公喺中環行咗四十五分鐘，咩都冇買到。原本佢喺雪廠街等車期間一直神情呆滯，淨係間唔中頭耷耷篤電話，直至有個唔知係咪同佢住埋同一屋苑嘅女士同佢打招呼，佢先至面露笑容。不過，呢位女士同佢應該唔係好熟，皆因巴士到時，佢哋都冇坐埋同一排，而靠窗坐低嘅麥齊光就不時托腮沉思。
區域法院九月裁定麥齊光串謀詐騙租金罪成，判佢監禁八個月、緩刑兩年，但佢已經提出上訴。其實近日卓妮已不只一次遇見佢，有日見佢一支公喺中環碼頭現身，一樣係漫無目的，莫非佢真係擔心單上訴官司？
卓妮