外間傳聞，公務員係一種非常清閒嘅官場生物，返工等收工，收工等放假，放假等退休。如果返工期間過分清閒而覺得無聊透頂，聽講公務員仲會織冷衫打發時間。事實有冇咁誇張呢？功夫茶相信，雖不中，不遠矣，公務員未必個個都係織冷衫高手，不過清閒基本上係事實，否則食物環境衞生署食物安全中心都唔會有醫生得閒到做兼職啦！
本報接獲投訴指出，有一個叫做李育奇嘅醫生，舊年由衞生署轉職食安中心，擔任食物監察及管制科風險管理組緊急應變小組醫生，秘撈兼職已經長達五年之久，先後喺幾間醫務中心應診，甚至喺食安中心辦公室正常工作時間處理醫務中心事宜，仲涉嫌損公肥私用辦公室嘅彩色印刷機印製告示單張。
投訴人踢爆，李育奇幾乎每日下班都由港島金鐘辦公室去到各個診所兼職，最常出沒嘅係油塘油麗商場嘅油麗醫務中心。本報記者按照地址上門「睇醫生」啦，發現李育奇黃昏大約六點左右抵達油麗醫務中心，診治咗大概八名病人，診金連藥費二百五十元。晚上八時四十分，李育奇從油麗商場步行十幾分鐘，去到鯉魚門廣場嘅恩澤醫務中心繼續應診，九點半左右離開。亦即係話，呢一個公務員嘅秘撈地點最少有兩個。
食環署確認，李育奇去年調職至該署擔任醫生，月薪介乎五萬四千二百多元至九萬二千七百多元，署方從未收過佢擔任外間工作提交嘅任何申請。衞生署亦證實，李育奇已調職，強調員工從事外間受薪工作須事先申請批准，並受《公務員事務規例》規管，如果發現有人涉嫌違規會按程序處理。
咁即係點呢？計功夫茶話齋，即係官場生物太清閒，署方監管又粗疏，話就話有規管，實際上一個二個放任自流。李育奇據講已即時辭職，咁即證明秘撈有問題啦。前衞生署高級醫生鍾沛康曾經被揭發未獲部門批准，擅自喺外面教授品酒課程，懷疑違反公務員守則。東窗事發之後，署方以鍾沛康「個人事宜」為由，冇交代是否採取紀律處分就話佢已經喺今年八月尾離職。
再講吖，成日話公立醫院人手不足，醫護人員七手八腳忙到一頭煙，偏偏食環署食安中心嘅醫生就得閒到放咗工仲有精力連走兩場做兼職搵真銀，你話係咪資源錯配吖？如果發現有人涉嫌違規當然要按程序處理啦，其實最好就係將冗員撥去做前線工作，一來唔使繼續浪費公帑，二來咯喎，算係造福病人吖嘛。之不過咁，慣於偷懶嘅冗員必須接受再培訓，否則好容易增添醫療失誤㗎！