政情：公民講場：「基」本得幾廿億 樹根叫人收皮

香港電視網絡不獲發牌已成定局，但係尋日立法會資訊科技及廣播委員會會議上，明明討論緊香港電台起新大樓，議員鍾樹根竟用大樓六十億元撥款借題發揮，話依家先知王維基點解會衰咗喎。佢話原來做個新電視台，淨係infrastructure （基建）都要六十億元，「唉，王維基嗰幾廿億身家，肯定收皮啦！」又話有咁嘅料，應該早一個禮拜畀佢，上個星期三用嚟砌提出用特權法查發牌文件嘅莫乃光，就可多啲武器啦，最後仲話「大佬，學人出嚟玩，（人哋）六十億呀？」但係其實份文件上個星期二已經畀咗立法會，佢早啲睇文件，咪可以用嚟砌莫乃光囉。