政情：蔣麗芸老公 開口夾着脷
本港五大商會尋日舉行商界聯席午餐會，邀請特首梁振英（CY）出席並做主講嘉賓，全程罕有地用中文而唔係同往常一樣用英文發言，未知係咪打破咗語言隔膜，工商界代表都把握機會提問，其中立法會議員蔣麗芸（Ann）嘅老公、中華總商會常務會董梁海明疑開口夾着脷，竟然將人口政策諮詢文件提及嘅勞動人手嚴重短缺問題，誤當作係長遠房屋策略督導委員會文件提出，初試啼聲提問就撞板而回。
李秀恒提問長氣
不過，梁海明嘅問題都叫一步到位，相反中華廠商會副會長李秀恒提問連意見長達四分鐘，搞到身為午餐會主持、廠商會會長嘅施榮懷都多次提醒盡快完成提問。
講番李秀恒向CY提出嘅意見，簡單嚟講係想政府考慮設立一個時限，可以向當局申請放寬地積比率或容許部分樓宇加建數層，期間李秀恒仲以油炸鬼小心食用可不抹嘴，以及漢堡包因有汁嘅關係一定要抹嘴為例，比喻興建高樓同屏風樓係兩回事，唔知現場有幾多人明白個比喻呢？