政情：何沛謙公民黨多老友
通訊及廣播事務管理局日前向立法會資訊科技及廣播事務委員會提交文件，指該局一直支持連發三個免費電視新牌照，擺明同政府唱反調。一眾泛民議員隨即將通訊局主席何沛謙捧成英雄，並建議喺下個月，再次邀請佢嚟立法會親身插多政府一次。有知情人士指出，何沛謙尤其多公民黨朋友，「貪曾」前特首曾蔭權爵士當年好重用佢，仲委任佢做多項重要公職。
本身係資深大律師嘅何沛謙，佢同外號「大狀黨」嘅公民黨多名核心成員各有唔止一段緣，其中現任大狀黨黨魁梁家傑係何沛謙嘅九龍華仁師兄，該校仲出過外號「李漢奸」嘅民主黨創黨主席李柱銘，以及民主黨立法會議員涂謹申等泛民法律界人士。
與梁家傑合作反廿三條
而何沛謙九五年起出任大律師公會執委，做足十年到○五年先卸任，期間幫過李志喜、余若薇、湯家驊同梁家傑四任大律師公會主席做事，呢四位大狀咁啱全部都係公民黨創黨成員。○三年《基本法》第二十三條立法期間，何沛謙更出任大律師公會副主席，同當時嘅主席梁家傑拍住上反對立法。何沛謙、余若薇及另一公民黨核心成員吳靄儀，依家仲共處同一間大律師樓添。
雖然何沛謙無跟隨幾位大狀老友加入公民黨，但吳靄儀幾年前想退休唔選法律界立法會議員時，據聞曾經大力游說過佢接棒。
湯家驊曾推薦掌律政司
到去年特區政府換屆，湯家驊更公開推薦何沛謙出任律政司司長，認為佢嘅立場同形象比最後獲委任嘅袁國強「中立」喎！而湯家驊個仔湯煒軒，據悉亦跟過何沛謙做實習大律師。
何沛謙同公民黨關係千絲萬縷，但出奇地獲貪曾政府重用，包括喺○五年委任佢做司法人員推薦委員會委員、○七年出任消費者委員會副主席、○八年接替全國政協委員馮華健做埋前廣播事務管理局主席，並於去年初貪曾臨下台前，獲過渡到新成立嘅通訊局做主席，任期三年。
現屆政府早前委任「梁粉」黃玉山「空降」消委會做主席，而無畀做咗多年副主席嘅何沛謙「坐正」，已多少反映到現屆政府對後者有幾信任。唔知何沛謙喺通訊局嘅任期到一五年屆滿時，政府仲會唔會畀佢續任呢？