今時今日，係人都知道保護個人私隱嘅重要，病人當然亦唔例外，可惜公立醫院好似無掩雞籠咁，病人私隱經常畀人剝光豬，真係冇病都激到有病，小病都激到大病o架。呢嗱，話口未完，又有病人嘅私隱被侵犯嘞，今次醜聞嘅主角輪到廣華醫院。
本報接獲投訴，廣華醫院一名病理部文員上月初私下帶女兒進入化驗部門辦公室，並擅自開啟部門電腦，取閱化驗資料，涉嫌嚴重違反員工守則，令大量病人私隱外洩。事件曝光之後，院方解畫補鑊，話部門高層數分鐘內已得悉事件並立即喝停，又話員工女兒無接觸過任何病人化驗報告內容，但就承認違規員工警覺性不足，部門已作出訓斥，並會根據紀律程序跟進咁話。
唉，次次都係事後補鑊，病人私隱已被洩漏，請問點樣補吖？計功夫茶話齋，公立醫院出現私隱漏洞，最主要原因唔係員工警覺性不足，而係管理層警覺性不足就真，化驗部門存放大量病人敏感資料，點可以好似無掩雞籠咁，任人自出自入o架？咁講啦，無論今次事件中有冇人洩漏病人私隱，事實就係公立醫院嘅私隱防線係幾咁脆弱，幾咁兒戲，佢哋根本唔當病人嘅私隱係一回事，唔怪得醜聞爆完一單又一單，直頭好似瘟疫蔓延！
講起都幾悲哀，病人面對病痛威脅已經夠難受，仲要承受多一層私隱外洩嘅心理壓力，真係情何以堪。不過講開又講，洩漏私隱嘅又點止公立醫院吖，任何市民都有機會中招o架。嗱，海關遺失儲存大量市民個人資料嘅USB電腦手指，消防處遺失記錄傷病者情況嘅救護車出勤紀錄，而警方仲離譜，多次經分享軟件FOXY外洩含報案人甚至臥底資料嘅內部文件，簡直靠害。大家話嘞，政府部門輪流出事，市民私隱毫無保障，港產官僚係咪抵鬧吖？
係呢，港府唔係早就成立咗私隱專員公署咩？點解仲會漏洞多多，烏龍百出？唉，私隱公署話就話保護市民私隱，其實呢個政治花瓶得個睇字嘅咋。試諗吓，市民私隱一次又一次被洩漏，佢哋做過乜吖？如果連政府及公營部門都管唔掂，仲點樣監管私人企業吖？所以話，公立醫院又好，紀律部隊又好，私隱外洩醜聞之所以禁之不絕，歸根究柢，咪就係因為私隱公署形同虛設囉。
即係咁，雖然私隱專員蔣任宏掌管郵政署期間曾爆出以針孔攝錄機監視員工醜聞，但係既然你家陣坐得呢個位，逗得呢份糧，就要履行職責，好好保護市民私隱，否則，新帳舊帳一齊算，你隨時罪加一等嘅咋！