修訂郊野公園範圍
發叔今個星期三首次出席修訂郊野公園範圍嘅《2013年郊野公園（指定）（綜合）（修訂）令》小組委員會，突襲提出修訂，點知因為字眼唔符合正式文本要求，當日只係通過作意向表態。唔知呢兩日係咪有法律中人指點，佢尋日就正式去信委員會，要求廢除將大浪西灣嘅「不包括土地」納入西貢東郊野公園，但就唔反對將金山同圓墩納入郊野公園範圍嘅修訂。
由於呢條係附屬法例，屬「先訂立、後審議」，議員修訂就要經分組點票。睇番議程最遲要喺下月四日，修訂就要提上大會表決，如果到時好似限奶令咁，一個唔覺意有人「拉布」，趕唔切喺嗰日表決，咁就成條法例原裝通過，所以發叔要認真拉票喇！