政情：建制爭區選 泛民超級危
泛民主派立法會議員涂謹申（阿涂）、馮檢基（阿基）同何俊仁（鐵頭仁）三人，去年喺立法會俗稱「超級區議會」嘅區議會（第二）功能界別選舉中勝出，但能否連任下屆立法會，關鍵係先要喺下屆區議員選舉勝出。據聞建制派開始對三人作針對性部署，搞到阿涂近日疑神疑鬼，遇上重量級委任議員落區工作，佢就以為係對方有意思踩場挑戰，查實佢只係杯弓蛇影，凸顯佢毫無信心。
雖然距離二○一六年立法會選舉仲有三年時間，但地區消息指建制派已開始醞釀人選挑戰三位泛民超級議員。不過，有傳鐵頭仁有意不再連任區議員，如果此事當真，建制派可以集中火力對付阿涂同阿基。翻查資料顯示，阿涂上次喺油尖旺奧運選區僅以百多票之差勝出，據聞阿涂當選後一直小心翼翼留意有無潛在對手。
阿基「主場」 滿布新人橫額
最近有傳油尖旺區議會副主席、委任區議員高寶齡呢個九龍社團聯會重量級人物蠢蠢欲動，有意出山撼低阿涂，隨即觸動阿涂嘅神經。有資深地區人士證實，高寶齡曾到阿涂區內大型私人屋苑開會，而且同部分屋苑居民相熟，難怪會令阿涂變成驚弓之鳥，但相信高寶齡係咪出山打涂仲係言之尚早，因為依家都未見高寶齡嘅橫額出現喎。
建制派另一目標人物係盤據深水埗麗閣選區多時嘅阿基，據聞阿基嘅老對手、工聯會范國輝經過連番挑戰阿基失敗後，有意退位讓賢，可能改由十大傑出工會青年工作者林偉文出戰，事關佢已經喺麗閣展開多方面工作，阿基橫額附近不遠處總係見到林嘅橫額，一副積極儲足彈藥同阿基開戰嘅狀態。
講開阿基，前日天主教監察組話阿基缺席立法會大會達十七次，阿基翻查立法會資料後澄清，其實佢只曾缺席兩次，究竟點解雙方說法有咁大差異呢？監察組回應話，佢哋係逐日計算議員有無開大會，至於立法會秘書處就係每逢立法會大會，只要議員曾經出席，無論之後連開幾多日，都會計算議員有開會喎。