政情：樹根呻廁紙冇得領津貼
區議員一向予人感覺都係理埋啲細眉細眼嘅地區工作，搞到某啲議員嘅眼光都特別狹窄。話說立法會民政事務委員會尋日開會，討論增加區議員津貼，點知身兼東區區議員嘅鍾樹根，就大呻營運開支申領唔到廁紙津貼，結果自己要啃咗筆數，睇嚟佢都好重視如廁暢唔暢順呢個「切身」議題喎。
樹根把幾火話，家陣議員辦事處經常有人出入，街坊同職員都要用廁紙，一個星期用兩卷又有乜出奇呢？因為民政事務處唔肯畀佢申領廁紙津貼，惟自己啃咗筆數，唔知呢筆數有幾多錢呢？樹根仲透露，佢有個助理做咗十八年，如果有日退休，按勞工法例支付咁大筆長期服務金都唔知點算，嗰時就要按埋層樓先至掂。
民政事務總署署長陳甘美華話，其實有好多林糝物品，可以申領雜項開支津貼，議員每月有四千元，樹根或者可以諗諗申領番呢筆廁紙數喇。對於有議員關注私樓辦事處租金高昂問題，民政事務局局長曾德成就話，建議加幅已經幫到百分之九十八嘅議員辦事處開支，如果租用高檔寫字樓就難以負擔喇，莫非佢暗示叫班議員咪咁大使？