為咗實現源頭減廢，政府有意實施垃圾徵費，構思當中嘅邏輯大概係咁樣嘅，當一個人丟得愈多垃圾，就要繳付愈多費用，到時咯喎，市民自自然然減少丟棄垃圾。於是乎，全香港嘅垃圾有機會從源頭開始減少。
之不過咁，垃圾徵費必須配合一個措施，就係規定市民將垃圾攞去特定地點處理，唔可以再好似以前咁樣隨手掟入街邊垃圾桶，意思即係話將來可能出現街邊完全冇垃圾桶嘅情況。一旦出現咁嘅情況，會唔會有人為咗慳錢同貪方便而非法棄置垃圾呢？計功夫茶話齋，若然官老爺嚴厲執法，或者可以杜絕非法棄置垃圾，不過以目前狀態推測，真係唔敢樂觀囉。
功夫茶嘅擔心唔係無的放矢o架，大家不妨睇睇一個實例。中環著名蒲點蘇豪區每晚入夜之後都會出現一個慘不忍睹嘅景觀，好多食肆同酒吧打烊前後將一袋二袋垃圾公然棄置於後巷甚至行人道，食環署絕少提出檢控，變相鼓勵缺德人士做一條有損市容嘅垃圾蟲！
呢嗱嗱嗱，本報記者喺深宵同清晨時分去過蘇豪區一帶視察，發現食肆同酒吧員工三更半夜將大包小包嘅垃圾胡亂棄置，當地嘅清潔工人稱之為「黑膠糯米雞」。垃圾堆積如山隨處可見，部分黑色膠袋連封口都懶，冷飯菜汁漏到一地都係，造成十分惡劣嘅衞生環境，重災區包括擺花街、士丹頓街以及威靈頓街，簡直係烏煙瘴氣，慘不忍睹。
喂，距離蘇豪區僅僅五分鐘路程就係二十四小時開放嘅結志街垃圾收集站，點解食肆同酒吧員工唔將垃圾送去呢一個收集站處理呢？無他嘅，懶惰係人之常情，再加上食環署亦係懶到出汁嘅公僕，疏於執法等於為垃圾蟲大開方便之門，任得佢哋將黑色糯米雞丟到滿坑滿谷，結果就係丟人現眼，害到香港貽笑國際，顏面盡丟。
正如區議員話齋，蘇豪區非法棄置垃圾問題持續多年，接獲居民投訴多不勝數，食環署現時每周只有一晚突擊巡查係唔夠o架，建議加密巡查並且改變策略，否則難以起到阻嚇作用。
其實，捉垃圾蟲呢家嘢，道理一字咁淺，勤於執法就唔會有咁多人犯法，公僕一旦玩忽職守，後果往往滿街垃圾。大家試想想，若然日後真係透過垃圾徵費企圖實現源頭減廢，會唔會出現大規模非法棄置垃圾吖？
清潔香港，人人有責，功夫茶身為奉公守法嘅良好市民，家陣提出一個建議，源頭減廢從官場開始。即係咁，官場之中嘅人形廢物清減得乾乾淨淨，搞清潔先至有希望吖嘛！