立法會尋日否決引用《立法會（權力及特權）條例》調查免費電視發牌事件，商務及經濟發展局局長蘇錦樑（Greg蘇）總結發言時，花咗唔少篇幅反駁泛民主派要求立會介入發牌事件嘅理據，其後走出會議廳會見傳媒時，突然領導人上身，左一句用「接見」形容自己早前同議員嘅會面，右一句加深大家對發牌準則嘅了解，似乎暗示自己解說工夫認真到家。其實Greg蘇突然領導人上身確實惹人反感，如果佢真係咁英明神武，發牌爭議就唔使淪落到今時今日嘅地步啦！
