政情：舊聲明當新料 莫乃光瘀爆
資訊科技界立法會議員莫乃光（Charles）近日為免費電視牌照風波頻頻曝光，尋日朝早佢拎住一份聲明見記者，自稱啱啱收到由香港電視主席王維基發出嘅最後通牒，要求政府喺下晝一點前公開交待發牌真相。不過，講咗幾句，Charles先發現原來自己手上份聲明係日前發出，惟有面懵懂講聲唔好意思。
搞錯王維基「最後通牒」
尋日朝早未夠十點鐘，Charles突然行近會議廳外嘅記者咪兜示意要發言，之後就手持一張由港視發出嘅聲明，批評政府至今依然無誠意解決問題。佢仲解釋王維基之所以要臨時發出聲明，可能係因為被部分建制派議員不斷「抽水」，所以特登出份聲明以正視聽，要求政府公開交代發牌真相。
講到呢度，有記者就問Charles手上份聲明係幾點收到，以及聲明發出日期係幾時，Charles然後望望張聲明，先至發現原來擺咗個特大烏龍，尷尷尬尬講多幾句後索性走人，真係瘀到爆。其實佢連日都有跟進事態發展，無理由察覺唔到，莫非佢掛住夠唔夠票通過引用特權法嘅動議？