政情：立會議員被圍 走秘道撤離

用停車場秘道須政府批准

由於年前立法會審議高鐵撥款時有被市民包圍嘅前科，所以前晚市民包圍立法會一役，秘書處似乎早有安排，兩日前已經講明會安排一架廿四座旅遊巴接載有需要嘅議員離開，仲有警察開路，確保安全。所以就算前晚門外群情洶湧，十幾位議員如金融界吳亮星、商界林健鋒、工業界梁君彥、李慧琼、葛珮帆等人，全部無有怕，就連一直無表態嘅勞工界潘兆平最尾亦現身，全部坐旅遊巴「逃亡」。

不過，建制派有成四十三人，唔係個個都坐旅遊巴，咁其他議員可以點呢？唔使驚，原來立法會地下停車場有一條「秘道」，呢條秘道平時有一幅銀色捲閘阻隔，一開閘就可以由立法會停車場通往政府總部停車場，議員就可以靜雞雞駕車過政府總部出口離開，就算幾多人包圍立法會，都傷唔到佢哋一條頭髮啦！據講議員陳恒鑌、陳克勤、鍾樹根都靠秘道駕車離開。

不過，由於葉劉淑儀嘅座駕停泊喺立法會大樓外，所以佢先要沿秘道步行過政府總部，然後再叫司機開車到政府總部附近接載佢。

據講呢條秘道要經政府批准先可以使用，唔知今次算唔算係行政立法嘅「互相合作」呢？與其如此離開，建築、測量及都市規劃界議員謝偉銓就醒目得多，留喺立法會多兩小時，等人潮散去後先至施施然離開。

譚耀宗黃國健寧留宿過夜

至於建制派兩大頭目譚耀宗同黃國健，亦都唔想私私縮縮，寧願喺立法會留宿過夜，雖然兩人聲稱有沖涼、有換衫，但係唔知有家歸不得嘅心情會係點嘅呢？