中環出更：青聯政總撐場 啟剛去唔到
立法會過去兩日討論泛民主派提出引用《立法會（權力及特權）條例》，要求政府交代有關免費電視發牌嘅討論文件，大樓外除咗聲援港視員工嘅市民外，建制派亦動員多個支持政府嘅民間團體到場搖旗吶喊。卓妮前日就發現香港青年聯會（青聯）同菁英會一班成員都有到場聲援政府，但只見部分青聯成員，亦唔見青聯主席霍啟剛到場坐鎮，莫非啟剛有更重要嘅工作在身？
免分散集會焦點
卓妮早前收到風，話今次立法會引用特權法調查免費電視發牌事件，支持政府嘅陣營不敢怠慢，動員多個民間團體及青年組織去政府總部佔據有利位置表達立場。前晚就現場所見，青聯共派出廿多人撐場，包括鄭重科、彭芷君、葉振都、林亨利等人，佢哋喺鐵欄懸掛寫上「反對濫用權力及特權法，維護行會保密制」標語。
據講，原本身為主席嘅啟剛都要奉命到場指揮大局，但最後因為霍家爭產官司仍然審緊，為免將集會嘅焦點分散，所以啟剛最後無去。
卓妮