中環出更：王國強自爆 父開過棺材舖
成功人士背後，總有不為人知嘅辛酸。大型承建商金城營造早前喺灣仔會展舉行創業五十周年晚宴，逾二千個政商名人到賀。身兼廣東社團總會主席嘅金城營造主席王國強（KK）致詞時自爆，父親王錦輝曾經喺內地開過臘腸店同棺材舖，來港後做過看更等散工，後來承包私人工程開公司。廿五年前KK接班時公司只得幾個職員，所以佢唔係含住金鎖匙出世。
創業金禧晚宴 政商齊賀
九一十歲高齡嘅王錦輝精神唔錯，致詞時聲如洪鐘，好多賓客爭相同佢道賀。KK人面廣，當晚到場嘅中港政商名人眾多，包括特首梁振英、政務司司長林鄭月娥等官員，以及多名行政會議成員。至於商界就有四洲集團主席戴德豐、金至尊主席黃英豪、百老匯攝影器材董事長李子良及中電企業發展總裁莊偉茵同丈夫等人。
早前宣布辭職嘅機場管理局行政總裁許漢忠都有現身，卓妮問佢做乜辭職？佢笑笑口答話：「退休啫！」但係當時佢發聲明話想喺事業上作其他發展，點算退休呀？佢笑而不答，認真神秘。同場仲有大埔慈山寺董事局成員李焯芬，問佢市民幾時至可以去參觀全球最大嘅戶外青銅觀音像，佢話寺廟工程埋緊尾，預料明年開幕喎。
太子珠寶鐘錶主席鄧鉅明亦帶埋次子鄧亦棋（Arthur）去捧場，修讀商業嘅Arthur啱啱畢業返港，依家喺公司幫手。講起訪港嘅內地旅行團驟減對零售業影響，鄧鉅明擔心衝擊將於明年慢慢顯現，公司惟有調整策略面對逆境。
卓妮