東方一出，誰與爭鋒！東方報業集團全新旗艦網站「on.cc東網」，以及全新「on.cc東網」Apps今日橫空出世，為全球華人帶來資訊新時代。「上東網，知天下」，讀者及網民有福喇！
二十一世紀係網絡世紀，互聯網已成為多數人日常生活嘅一部分，東方報業集團作為香港報壇一哥， 一向嘅宗旨係精益求精，與時並進。唔係功夫茶賣花讚花香，有事實為證o架，東方報業旗艦網站「on.cc東方互動」一直係本港最受歡迎、最多人瀏覽嘅新聞網站，單月不重複瀏覽人數逾三百萬，瀏覽量每日逾二千萬頁次。東方報業為求更上一層樓，對「on.cc東方互動」進行徹底革新，推出全新旗艦網站「on.cc東網」，立足香港，服務全球華人。各位讀者可能會問，呢個新網站究竟有乜特別呀？
嗱，等功夫茶話你知喇。新旗艦網站進一步加強內容，新聞、財經、娛樂、體育、生活及評論，包羅萬有，最快最新，而且因應唔同讀者需要，設有繁體同簡體字選擇。「on.cc東網」一大革新就係按港澳、台灣、大陸及國際劃分新聞，井然有序，方便閱覽。第一波首先推出台灣版，喺當地設立分社，增聘人員，建立強勁嘅編採隊伍，提供最地道、最詳盡嘅台灣新聞。接着仲會喺大陸、美加、歐洲、澳紐等地建立分社，增聘當地記者，建立遍布世界嘅編採隊伍，為全球華人提供度身訂造嘅各類資訊。正所謂，東網在手，天下我有，快人一步，理想達到！
講到快人一步，就唔能夠唔提即時新聞嘞。東方報業擁有全港最龐大嘅編採隊伍，為咗替「on.cc東網」打造最強嘅內容，不斷擴充編採隊伍，陸續喺世界各地增聘記者，務求為全球華人提供二十四小時最快、最準確、最詳盡嘅即時資訊，而且每則新聞仲加入大量相片同短片添。另外一項特色係，首頁頂部「焦點新聞」羅列當日最受注目嘅新聞，助讀者掌握重要資訊，真係無微不至o架。
當然喇，今次改革亦唔少得《ontv東方電視》，除咗依照「on.cc東網」按地區劃分新聞之外，喺港澳地區更分設新聞、娛樂、財經、體育及生活五大頻道，務求令大家有全新嘅視覺享受。
東方紅，太陽升，東方報業係香港首屈一指嘅新聞權威，旗下《東方日報》及《太陽報》分佔全港銷量第一及第三位，兩報讀者合共超過五百四十七萬人，係當之無愧嘅全港最強。為方便網民閱覽，全新「on.cc東網」將集團旗下刊物整合喺網頁左側嘅Menu Bar，輕輕一按即可連接到《東方日報》及《太陽報》網頁同電子報，以及《好報》電子報、《FLASHoN》電子版同《ontv東方電視》，一目了然，方便快捷。順便一提，電子報亦係當年東方報業首創o架，呢種以翻揭形式上網閱覽報章嘅創舉，既方便，又可以享受傳統閱報樂趣，一舉兩得。
最後想提提大家，「on.cc東網」Android手機Apps亦於今日同步推出，其他手機版本嘅Apps隨後亦會陸續更新。總而言之，只要東網在手，世界盡在掌握，約定你喇，網上見！