新民主同盟立法會議員范國威（Gary）等人早前提出「源頭減人」，要求港府收回內地單程證審批權，因而被指歧視內地新移民，風波一發不可收拾。
繼泛民主派同民間團體前日同佢哋劃清界線，另搞反歧視聯署聲明後，最新連新同盟亦內訌鬼打鬼，至少兩名新同盟區議員或會「過檔」參與泛民同民間團體嘅反歧視聯署聲明，明摑Gary一巴。Gary搞本土主義搞到走火入魔兼火燒後欄，睇怕好難平息風波。
新同盟沙田區議員丘文俊日前喺社交網站分享泛民同民間團體嘅反歧視聯署聲明，明確表示可否以佢嘅議員辦事處名義加入為聯署團體。而另一「過檔」簽署聲明嘅係同為沙田區議員嘅容溟舟，佢表明支持泛民聯署聲明主因係內容包容性較強，又意有所指話從政者無理由帶有歧視眼光，但佢依家暫未有意退出新同盟。
有知情人士更爆料，其實Gary同新同盟班兄弟嘅嫌隙始於兩個月前嘅聯署廣告，據講Gary當時未有同新同盟兄弟商量，自把自為，事件發展至今幾近失控，被外界狠批歧視內地新移民之餘，連部分兄弟都唔撐，睇嚟Gary要反思吓，否則地區樁腳眾叛親離時，下屆想連任都幾難。