政情：請鄉紳外遊 發叔好孤寒
新界村代表仲有一年多就要改選，據聞唔少有意參選或競逐連任嘅人士已密鑼緊鼓準備打呢場選戰。咁啱喺呢個時候，鄉議局主席劉皇發就請一班鄉紳上郵輪玩幾日，莫非發叔想鋪路再冧莊做多屆主席？抑或純粹只係聯繫鄉紳感情呢？無論原因係乜，我哋就聽聞有鄉紳對今次行程有啲微言，原來要兩個人同住一間房，話有啲唔方便喎，唔知佢哋咁講係咪覺得發叔孤寒充闊佬呢？
麻甩佬一齊瞓勁惡頂
鄉議局成員最近頻頻出外，早前一班鄉事委員會主席已獲發叔贊助，去上海參加國情研習班，本月底又有一班成員齊齊去台灣交流。據聞喺呢兩個旅程之間，發叔又掏腰包請約二十名鄉委會主席、鄉議局成員及家屬上郵輪「海洋水手號」玩，由啟德郵輪碼頭出發去台灣高雄。不過，我哋聽到有鄉紳呻話，發叔要佢哋兩個人共住一間房。其實喺郵輪上已朝夕相對，晚上仲要兩個麻甩佬一齊瞓，認真惡頂。
一班鄉紳浩浩蕩蕩上郵輪出發，隨團除咗有發叔同佢囝囝劉業強外，仲有副主席張學明及多名鄉委會主席，包括元朗十八鄉梁福元、錦田鄉鄧賀年、八鄉曾憲強、荃灣鄉鍾偉平、上水鄉侯志強、沙田鄉莫錦貴及坪洲鄉黃漢權等，算係相當齊人。據消息透露，原來梁福元同侯志強兩個猛男住埋同一間房，而且間房仲只得一張大床添，唔知幾日流流長會有咩事發生呢？侯志強又會唔會半夜扎醒話要捉蛇呢？
郵輪公司安排惹不滿
講番新郵輪碼頭嘅運作，聽聞有啲鄉紳唔滿意郵輪公司要佢哋早三、四個鐘頭到碼頭，話覺得咁樣好嘥時間喎。另有乘客許先生就話要等足四十五分鐘先成功登上郵輪，埋怨等得太耐。同時亦有的士司機反映前往郵輪碼頭沿途路牌指示唔清晰，睇嚟有關部門真係要快啲改善吓喇。不過，我哋之前講過有個廁所無垃圾桶，尋日就見到地上放咗個透明膠袋畀旅客丟垃圾，咁樣似乎核突啲囉，記者影影吓仲被保安趕走添，莫非想臭屎密冚？