中環出更：CY「微服出巡」歎美酒佳餚
美酒佳餚巡禮一連四日喺中環新海濱舉行，尋日天文台懸掛一號風球，現場人流較為疏落，有市民就發現特首梁振英（CY）同太太唐青儀嘅蹤影。據現場目擊者話，大約下午三點鐘，CY兩公婆「微服出巡」去到美酒佳餚巡禮會場，先去一個售買高級食材嘅攤檔，買咗二十元白酒忌廉青口、二十元辣酒翡翠螺及四十元和牛，即場品嘗。
據該食材店職員阿源轉述，當時CY兩公婆同幾名便衣警員突然出現喺佢面前，問佢呢度有咩好食，阿源好愕然咁介紹過美食後，然後同CY講：「可以免費試食o架！」點知CY話想食多啲，所以就幫襯咗八十元。CY隨後又問有冇送貨服務，阿源話買滿一千元免費送貨，之後CY就移師到試酒區。
CY去到香港最受歡迎葡萄大獎嗰兩個試酒攤位，總共試咗兩杯由中國天津製造嘅紅酒及白酒，呢兩種酒都曾經喺香港攞獎，而酒精含量分別百分之十三點八及十一點五，應該飲完呢兩杯酒都唔會醉啩？CY試飲葡萄酒後，仲去埋專尚品酒區，逗留咗十分鐘，空手而回。有目擊者形容，今次CY「微服出巡」非常低調，好處係無擾民，免得影響檔戶生意。
卓妮