中環出更：中出新會所開幕 變謝票酒會
城中大商會多數擁有自家會所餐廳，方便會員、會董及各方好友聚腳。中華出入口商會（中出）最近亦斥資二百幾萬元翻新會所，並改為主打河鮮新菜式。日前會所舉行開幕酒會，中出會長莊成鑫、進出口界立法會議員黃定光（象哥）、港區全國人大代表陳勇等人齊集。原來陳勇今次到賀係為咗謝票，事關佢參選人大時，中出係佢嘅重要大票倉。
當日陳勇同中出副會長張學修好好傾，皆因做過海南商會會長嘅張學修就係佢嘅支持者。陳勇話，雖然計唔到中出總共投佢幾多票，但諗番當時競爭好激烈，相差幾票結果可能就唔同晒。
有個新簇簇嘅會所，交遊廣闊嘅象哥最開心，佢話坊間粵菜酒家太多，所以經過一輪精挑細選後，決定同金殿集團合作。細數佢最鍾意嘅菜式，包括無論清蒸或油浸都咁好味嘅冧哥魚，仲有砂鍋魚嘴、欖角排骨等，諗起都流口水。中出青年部主任單曉斌（Andy）都喺度，佢啱啱榮升爸爸，囝囝出世仲未滿月，提到囝囝就笑呵呵。
「創二代」將來港交流
講起青年部工作，Andy話嚟緊會招待訪港嘅內地一班「創二代」，佢話「創二代」係內地新興潮語，指接班後注入創意或另行創業嘅企業家第二代，唔止「富二代」咁簡單。Andy都係皮草生意嘅第二代，佢話接班後時刻摸索如何創新，希望到時同內地「創二代」交流，可以擦出新火花。
卓妮